(Մեկնարկեց 2025-2026 թթ ուսումնական տարին)
‹‹Ինձ հաջորդող սերունդներին, թոռներիս, ծոռներիս կտակում եմ տիրապետել հայոց լեզվին: Ամեն մեկը պետք է իր պարտքը համարի ուսումնասիրել հայոց լեզուն, գրագետ լինի հայերենից, անկախ այն բանից, թե քանի տոկոս է նրա մեջ հայկական արյունը: Այդ տոկոսը ոչինչ չի նշանակում: Մենք փոխանցում ենք սերունդներին ոչ թե արյուն, այլ գաղափարներ և գաղափարների մեջ ինձ համար ամենաթանկը հայոց լեզուն է»։
Աշխարհահռչակ աստղաֆիզիկոս Վիկտոր Համբարձումյանի այս կտակը արդիական է նաև այսօր։
Հայրենիքից դուրս ապրող յուրաքանչյուր հայի առաջ միշտ ծառացած են եղել կարևորագույն խնդիրներ՝ հայ մշակույթի, պատմության, մայրենի լեզվի ուսուցումը և փոխանցումը հաջորդ սերունդներին: Երեխաների հայեցի դաստիարակության հիմնաքարն է մայրենիի իմացությունը, պահպանումն ու զարգացումը:
Ռոստովի մարզում և Դոնի Ռոստով քաղաքում գործող հայերենի խմբակները, հայկական եկեղեցիներին կից կիրակնօրյա դպրոցները 2025-2026 թթ ուսումնական տարում իրենց շուրջը կրկին համախմբեցին տասնյակ մանուկների: Առավել ոգևորված էին հատկապես առաջին անգամ հայերենի խմբակներ հաճախողները, ովքեր նոր էին ոտք դնում հայկական կրթօջախ՝ սովորելու և դաստիարակվելու հայրենասիրական ու ազգային մշտամնա արժեքներով։
Եվս մեկ ուսումնական տարի գիտելիքների ամբարման ու արժեքների ճանաչման, հոգևոր ու մտավոր հասունացման, նոր ձգտումների ու ջանադրության ժամանակամիջոց, որը նախաշավիղն է մեր հայրենիքի զարգացման ու առաջադիմության: Իր լուսավոր ապագային նայող ամեն ժողովրդի և հասարակության համար ուսումն ու կրթությունը առաջնահերթ նպատակներ են: Այդպես է դարերով ընկալել նաև մեր ժողովուրդը՝ նեղություններով լի ժամանակներում անգամ վառ պահելով իմացության ու կրթության ջահը: Այս համոզումն առավել պիտի առաջնորդի մեզ այսօր, երբ աշխարհն ալեկոծվում է իրարամերժ ընթացքներով:
Թո΄ղ 2025-26 ուսումնական տարին առատ լինի բարձր արդյունքներով, որոնք պիտի լուսավորեն մեր ժողովրդի ճանապարհը ու ծառայեն մեր հայրենիքի զորացմանն ու առաջընթացին: Գիտելիքի հետ հավատ ու սեր պիտի փոխանցեն մանկավարժները մատաղ սերնդին, որպեսզի այդ արժեքներով նրանք դաստիարակվեն ու ապրեն, ինչպես ապրել ու գոյատևել է հայ ժողովուրդը դարեր ի վեր:
Եկեք ազգովի պահենք ու պահպանենք մեր լեզուն՝ մեր Հայրենիքը:
Բարի երթ դեպի նոր ուսումնական:
Արմինե ՀՈՎՍԵՓՅԱՆ
ԱՆՑՆԵԼՈՎ ՀՂՈՒՄԸ՝ ԴՈՒՔ ԿՏԵՂԵԿԱՆԱՔ
ՌՈՍՏՈՎԻ ՄԱՐԶՈՒՄ ԵՎ ԴՈՆԻ ՌՈՍՏՈՎ ՔԱՂԱՔՈՒՄ
ԳՈՐԾՈՂ ՀԱՅԿԱԿԱՆ ԽՄԲԱԿՆԵՐԻ ՄԱՍԻՆ