(Մեկնարկեց 2024-25 ուսումնական տարին)
‹‹Մենք հաջորդ սերունդներին փոխանցում ենք ոչ թե արյուն, այլ գաղափարներ, և գաղափարների մեջ ինձ համար ամենաթանկը հայոց լեզուն է։ Այդ կապակցությամբ յուրաքանչյուր սերունդ պարտավոր է հաջորդին սովորեցնել հայոց լեզուն»։
Այս պատգամն ստացել ենք մեծանուն գրող Վիլիամ Սարոյանից, ով շատ լավ գիտակցել է մայրենի լեզվի և հայոց մշակույթի կարևորությունը հայրենի սահմաններից դուրս։
Հայրենիքից դուրս ապրող յուրաքանչ-յուր հայի առաջ միշտ ծառացած է եղել կարևորագույն խնդիր՝ ազգային ինքնության, մշակույթի, պատմության, մայրենի լեզվի ուսուցումը և փոխանցումը հաջորդ սերունդներին: Մեր լինելիության և մեր երեխաների հայեցի դաստիարակության հիմնաքարն է մայրենի լեզվի դասավան-դումը: Սփյուռքում գործող հայկական դպրոցների, հայ համայնքի և Հայ Առաքելական Սուրբ Եկեղեցու դերն ու նշանակությունն անգնահատելի են հայապահպա-նության գործում:
Այսօր, երբ օտար ափերում մշտապես ավելանում է հայերի թիվը, ՀԱՅ մնալու և մայրենին սերտելու անհրաժեշտությունը դառնում է էլ ավելի պարտավորեցնող ևկարևոր հիմնահարց: Խնդիր, որի լուծման շուրջ տարվող շարունակական աշխատանքներն իր ուշադրության և մշտական հոգածության կենտրոնում է պահում Դոնի Նախիջևանի հայ համայքը՝ գլխավո-րությամբ համայնքի խորհրդի նախագահ Հարություն Սուրմալյանի և տնօրեն Սերգեյ Սայադովի:
Ռոստովի մարզում և Դոնի Ռոստով քաղաքում գործող հայերենի խմբակները, հայկական եկեղեցիներին կից կիրակնօրյա դպրոցներն իրենց շուրջն են համախմբում տասնյակ հայ մանուկների:
Այս նոր ուսումնական տարում ևս հայկական բոլոր կրթօջախներն իրենց դռներն
էին բացել հայ մանուկների ու պատանիների առջև՝ ավետելով 2024-25 ուսումնական տարվա սկիզբը: Հուզված, բայց միևնույն ժամանակ առավել ոգևորված էին հատկապես առաջին անգամ հայերենի խմբակներ հաճախողները, ովքեր նոր էին ոտք դնում հայկական կրթօջախ՝ սովորելու և դաստիարակվելու հայրենասիրական ու ազգային մշտամնա արժեքներով ու հոգևոր գիտակցությամբ։
Հայերենի խմբակների ուսուցիչները ջերմորեն ընդունեցին իրենց սաներին, հորդորեցին սրբորեն պահել ու պահպանել այն նվիրական ժառանգությունը, որն անշեղորեն փոխանցվել է դարերով և հիշեցրեցին նաև, որ հետայսու մենք ենք պարտական այն հաջորդաբար փոխանցելու մեր հաջորդներին։
Յուրաքանչյուր ուսումնական տարվա ընթացքում բոլոր հայկական կրթօջախներում ծրագրվում և իրականացվում են տարատեսակ միջոցառումներ՝ բաց դասեր, ցերեկույթներ, վարպետության դասեր, փառատոններ, ազգային և կրոնական տոներին նվիրված միջոցառումներ, օլիմպիադաներ և այլն: Երեխաները մասնակից են դառնում տարբեր արարողությունների և այդ շրջանակներում ծանոթանում են նաև ազգային խոհանոցին, վիրտուալ այցելում են Մադենադարան, Կասկադ, Մարտիրոս Սարյանի տունթանգարան: Ամռանը շատերը մասնակցում են ‹‹Քայլ դեպի տուն» ուսումնաճանաչողական ծրագրին, մեկ-նում են Անապա քաղաքում գործող հայկական ճամբար:
Հայրենիքից հեռու բնակվող հայության համար կրթօջախները կարող են դառնալ փոքրիկ հայրենիք: Այդպիսին են նաև Ռոստովի մարզում և Դոնի Ռոստով քաղա-քում գործող հայերենի խմբակներն ու դպրոցները, որոնք օտարության ափերում ստանձնել են հայապահպանության սրբազան առաքելություն և պատվով ու անսահման նվիրվածությամբ են կատարում այն։
Նոր ուսումնական տարվա մեկնարկն արդեն տրված է: Աշակերտներն ուսուցիչների ուղեկցությամբ արդեն դասարաններում են՝ զինվելու նոր գիտելիքներով և մաշտոցյան գիրը հավերժ պահելու խոստումով:
Թո΄ղ 2024-25 ուսումնական տարին լինի հույսերի ու նպատակների իրագործման և գիտելիքի ձեռքբերման արգասաբեր տարի:
Արմինե ՀՈՎՍԵՓՅԱՆ
ԱՆՑՆԵԼՈՎ ՀՂՈՒՄԸ՝ ԴՈՒՔ ԿՏԵՂԵԿԱՆԱՔ
ՌՈՍՏՈՎԻ ՄԱՐԶՈՒՄ ԵՎ ԴՈՆԻ ՌՈՍՏՈՎ ՔԱՂԱՔՈՒՄ
ԳՈՐԾՈՂ ՀԱՅԿԱԿԱՆ ԽՄԲԱԿՆԵՐԻ ՄԱՍԻՆ
